Waluh Bajarang

Paribasa Banjar banyak maambil ngaran tanaman, buah wan satua nang ada di banua Banjar, Kalimantan Selatan. Ngaran tanaman, buah wan satua nang di hulu wan kuala bisa lain-lain sambatannya.

Parigal urang Nusantara saku sama haja: rahatan muar, garigitan wan sangkal, katuju manyumpah. Urang Betawi manyambat “busyet”, urang Sunda “kehet”, urang Banjar damintu jua. Urang Banjar nang tahu di adat wan tahu di basa kada manyambat “bungul” wan “tambuk”, tagal “binuhung karing”; “kada pintar”, atawa “waluh bajarang”.

Buah “waluh” nang “bajarang” rasanya hambar, ganyau, kada nyaman. Rahatan sarik, muar wan sangkal lawan urang, bahanu urang Banjar manyambat “waluh bajarang”. Amun disambat “bungul” atawa “tambuk”, urang bisa sarik -- amun “binuhung karing”, “kada pintar”, atawa “waluh bajarang”, urang kada pati sarik.
 
Imbah bagawi, bahanu Utuh Tipang ka warung Aluh Kaciput. Di banua Banjar, warung kada sahibar sagan barucau, tagal wadah bacangkurah, bacucuk buku, bamujakarah, mamandirakan usaha; mamandirakan haraga minyak, iwak, baras, rarampah, wan sarabanya.

“Mambari maras nasip Adriansyah, Julak ai,” ujar Aluh Kaciput lawan Utuh Tipang nang bahunjur batis di bangku panjang, bahindapang ka tihang. “Imbah ditangkap KPK, kada jadiam sidin bacalun hubnur. Ujar maruaiku nang bagana di Pelaihari, rahat jadi Bupati Tala sidin baik haja lawan warga. Dimapa nasipnya kaina?”

“Cah... Damintu pang manusia. Kita kada tahu pahatiannya. Wayah handak, samunyaan pupura baik, bajanji maanduh-anduh, maarai gambar muha bapuluh-puluh. Maka ayatnya sama haja, kakaitu jua. Saku tukang ulahnya bubuhan pambalantikan, sahibar bacari hujungan, kada tahu adat budaya. Samunyaan mambawa ngaran banua wan agama. Handak bagawi sagan kamaslahatan warga, ujar. Lillahi ta’alla, ujar. Amun sudah tapilih, tahuam pulang. Saku waluh bajarang...” (ysas)

(“Habar Banua”, TVRI Kalimantan Selatan, Banjarmasin. Siaran Jumahat, 17.04.2015, Pukul 5 kamarian.)

Sumber:
https://www.facebook.com/y.s.agus.suseno/posts/752710144848498?comment_id=753522374767275&ref=notif&notif_t=feed_comment_reply