Rasa Di Hujung Ilat

Rahatan bacangkurah, basurah, barucau atawa bapandir, bahanu urang Banjar baucap, “asa di hujung ilat”. Ada nang handak dipadahakan, tagal kalumpanan. Parak tasambat, tagal kada ingat.
Di warung Aluh Kaciput, Pambakal Utuh Tipang takumpul lawan kakawalan, basurah pamilihan hubnur, bupati wan walikota di banua Banjar, Kalimantan Selatan, tutup tahun kaina.

“Buhanmu adalah sudah baisi calun sagan dipilih?” ujar Pambakal Utuh Tipang.
“Balum wayahnya, Pambakal ai,” sahut Utuh Mantri sambil manyulum wadai balungan hayam. “Calunnya balum ditantuakan. Urang hanyar basiap.”
“Bujur haja, tagal nang bacalun sudah banyak maarai gambar, minta pilih.”
“Adalah calun nang mambari duit, Pambakal?” ujar Utuh Maklar, cagat talinga.
“Adalah binian banua nang bacalun?” ujar Aluh Kaciput jua sambil maulah satrup.
“Saku kadada, Aluh Kaciput ai. Binian banua saku wani bakalahi haja, kaya Ratu Zaleha wan Aluh Idut jaman Walanda bahari. Ikam tu aur duit haja nang dipikirakan, anu ai,” ujar Pambakal Utuh Tipang.

“Amun kada jadi baras, baik paraya, Pambakal ai,” Utuh Maklar mangancang. ”Baik bacari, mamaklar panumpang di taksian. Amun tapilih, inya jua kaina nang lima tahun nyaman. Amun tapilih pulang, sapuluh tahun. Duduk, tanda tangan, duit datang saurang. Wahini amun handak tapilih, tagal indah kaluar duit, awam.”

“Nah, hikamam,” Pambakal Utuh Tipang batapak dahi. “Amun damintu, pacangan daur. Amun tapilih, saku tanah banyu banua dijualnya sagan mambulikakan mudal. Amun handak jua, ikam dapati haja calun... Ah, siapa ngarannya... Asa di hujung ilat...” (ysas)

(“Habar Banua”, TVRI Kalimantan Selatan, Banjarmasin. Siaran Jumahat, 01.05.2015, Pukul 5 kamarian.)

Sumber:
 https://www.facebook.com/y.s.agus.suseno/posts/760056760780503?comment_id=760201947432651&offset=0&total_comments=6&ref=notif&notif_t=feed_comment_reply