Lambat Mambanam Kapas

Mun dipikirakan, “lambat mambanam kapas” asa mustahil. Mun dicucul lawan api, kapas lakas tabanam. Mun kapas bantal wan tilam tabanam, bisa kasalukutan. Tagal, paribasa Banjar bamantik, batabi, baparnum, basa barinda.
 
“Lambat mambanam kapas” paribasa Banjar sagan urang nang, biar tuhuk bakawan, samuak saliur, sarantang saruntung, salapik sakaguringan, bisa tahual. Mun handak tahual, satumat gin kawan bisa jadi musuh, “lambat mambanam kapas”.
 
Takisah, Aluh Kaciput. Imbah manyimpuni warung, inya baharaguan di rumah. Gawian di rumah bilang kada kasudahannya. Anaknya balum bulik sakulah. Lakinya, Utuh Tipang, manggalau iwak di parit nang pandit. Musim kamarau rami bagalau.

Imbah tuntung baharaguan, Aluh Kaciput kaganangan rahat di warung, wayah Utuh Kabuau bakancangan lawan Utuh Luhau. Asing-asingnya malawanakan calun hubnur pilihannya. Ujar Utuh Kabuau, calun hubnur pilihannya pambaiknya. Utuh Luhau, nang mamilih calun hubnur lain, baucap damintu jua. Asing-asingnya mawada.

Utuh Kabuau bakancangan lawan Utuh Luhau. Basarikan. Parak batamparan. Urang bajauhan. Manggatar lintuhut Aluh Kaciput. Rahat papanasannya, Utuh Kaminting mancabut parang bungkul, bakuciak: “Ampih bahualan! Baranai samunyaan!”

Wayah lakinya datang mambawa iwak haruan, sapat wan papuyu kulihan bagalau, Aluh Kaciput bakisah. Di higa rumah, Utuh Tipang manggisik batis wan awak nang licak. Sambil bakubui, inya baucap: 
“Iya am, Umanya ai. Damintu pang sudah. Makanya am, padahi anak kita: apik-apik mambawa diri. Dijaga pamandiran. Jangan adu asah. Banganga dahulu, hanyar baucap. Urang kita balum hingkat balain pandapat, mahargai pandapat wan pilihan nang lain. Mun kurang-kurang, bisa bakalahi. Lambat mambanam kapas...” (ysas)

(“Habar Banua”, TVRI Kalimantan Selatan, Banjarmasin. Siaran Salasa, 28.07.2015, Pukul 5 kamarian.)

Sumber:
https://www.facebook.com/y.s.agus.suseno/posts/805554932897352?comment_id=805579532894892&offset=0&total_comments=2&notif_t=feed_comment_reply