Naik Di Pinang, Turun Ka Hanau

Julak Utuh wan Acil Aluh bahari urang sugih di kampungnya. Di kampung hanyar, badua laki-bini tu saban hari batungguan di pinggir kartak, “sapamatuk sapangikih”, bacari rajaki di bawah rapun kariwaya. Julak Utuh maambil upah manambal ban, Acil Aluh bajualan bingsin, sarantang saruntung, mahadang rajaki matan urang nang lalu lalang.

Wayah hari panas manggantang, Julak Utuh taungut. Acil Aluh mamutiki dadaian di rumah, salajur maambil nasi wan lauk makan. Julak Utuh kaganangan wayah anum. Kada karasaan, banyu matanya titik.
 
Wayah kawitannya hidup, kabun gatah mayu haja gasan inya sapaadingan. Kawitannya tuhuk mamadahi, supaya inya cangkal bagawi. Tagal, inya kada igul-igul: mu’ul, mucil, bangang, hungang. Papadah kawitan kada diasi. Inya aur baramian haja, hari-hari bacatur di gardu, basaung hayam, bagandakan wan bakunjangan.

Sampai inya kawin, kawitannya habis umur tunggal ikungan, tanah wan kabun gatah dibagi-bagi, parigalnya kada ubah jua. Nang ngaran “handap balikat”, rahat ada nang handak manukari kabun gatahnya, talinganya cagat. Sabujurnya, urang kada manukari kabun gatahnya, tagal maunting batu harang di tanahnya. Mulanya, inya piragah indah. Imbah maitihi duit nang salanjung, liurnya titik.
Harta barana sipatnya samantara. Mun dikutili tarus, lingis. Imbah lingis, takujingis. Tunggal dikitan, harta Julak Utuh tajual. Indah supan lawan jiran, inya madam ka banua urang; manyiwa rumah, maambil upah manambal ban wan bajual bingsin di pinggir kartak.

Manaiki rapun pinang, sutil haja. Batangnya kujur. Manaiki rapun hanau, tangalih. Hundayang wan haduknya landap, hingkat malukai awak. Mun maambil juruh gasan diulah gula habang, rajin urang baulah “sigai”, tangga gasan naik-turun. Hidup Julak Utuh paribasa “naik di pinang, turun ka hanau”: asalnya sugih, ayungannya susah. Wayah sugih, indah bausaha. Imbah susah, hidup marista. (ysas)

(“Habar Banua”, TVRI Kalimantan Selatan, Banjarmasin. Siaran Arba, 17.12.2014, Pukul 5 kamarian.)

Sumber:
https://www.facebook.com/y.s.agus.suseno/posts/682309015221945?comment_id=682317861887727&offset=0&total_comments=4&ref=notif&notif_t=feed_comment_reply