Ganal Hampadal

Ganal hampadal” paribasa sagan urang “wani”. Amun kada wani, ngarannya “halus hampadal”, “pamburisit”. “Wani” kada musti “wani bakalahi”. “Wani kada tamakan hak urang”, “bini nang wani kada makan duit haram barian laki”, “wani” jua ngarannya. Arti “wani” balum tantu kada baik.
Bini nang “wani lawan laki”, balum tantu kada baadat. Saku ada alasannya. Saku lakinya wala, sakahandak lawan bini. Saranti wani lawan Walanda rahat “Amuk Hantarukung” di Kandangan, “Aluh Idut” wan Ratu Zaleha rahat Perang Banjar damintu jua.
Aluh Kaciput tamasuk “wani” jua. Imbah abahnya habis umur, inya “wani” manjunjung nyiru, kada supan-supan bajual wadai kuliling kampung. Sambil sakulah, inya mandangani umanya manggaduh wan mambari makani adingnya nang sajurut.

Nang ngaran tuhuk marista, bahujan bapanas bausaha, imbah ganal, inya sarik wayah di sakulahan disambati Utuh Tipang “hirang lutung”. Utuh Tipang manyambat sambil mangijipi. Kada mawada, tagal maajaki, manggayai. Bahanu Utuh Tipang bacuntan maitihi. Rahatan hujan, tabarungan taimbai bataduh di warung, Utuh Tipang disugak Aluh Kaciput:
 
“Napa pian manyambati ulun hirang lutung? Napa maksud?”

Utuh Tipang “kaya siput dipais”, kapulingaan. Aluh Kaciput asa kada purun. Utuh Tipang urangnya baik wan gagah. Saku inya ada hati, tagal kada wani bapadah.

Supaya hati Utuh Tipang kada gulang-gail, sabaluman mandi, Aluh Kaciput mambaca isim Fatimah: “Bismillahirahmanirahiiim... Mandiku mandi Siti Fatimah/ Air sakandi kucucurakan/ Kun jabiyal ujud, aku jua nang diujudi Utuh Tipang!/ Mayati, mayati Sulaiman jati/ Atas Engkau aku diperjudukan/ Karna suam datu Adam dan Hawa!/ Barakat laa illaha illalah, Muhammaddarasulullah...!”

Sambil manyiram banyu ka awak, Aluh Kaciput kaganangan pitua aruah datunya: “Jadi binian jangan pamburisit, kaina tapulilit! Musti ganal hampadal!” (ysas)

(“Habar Banua”, TVRI Kalimantan Selatan, Banjarmasin. Siaran Saptu, 11.04.2015, Pukul 5 kamarian.)

 Sumber:
https://www.facebook.com/y.s.agus.suseno/posts/749293435190169?comment_id=749389368513909&ref=notif&notif_t=comment_mention