Hundang Bapadah Ratik

Paribasa Banjar caramin hati, akal, adat wan budaya urang Banjar, gasan maniring parigal wan idabul bubuhan papadaan. Gasan mangaritik. Papadah nang bamantik. Supaya urang Banjar baadap wan batata krama; kada baparigal nang kada sampuraka; kada balalakun nang kada-kada, nang kada sasuai agama, adat wan budaya.
 
Urang Banjar sama haja lawan nang lain: ada nang baik, ada nang kada. Tagal, urang Banjar kada rigi lawan urang nang agak wan kapiragahan. Urang Banjar katuju lawan urang nang, bujur bailmu, tagal barandah. “Hundang bapadah ratik” sama kaya “barandah pada kancur”: paribasa gasan urang nang, bujur bailmu, tagal indah baarai, kada agak wan kapiragahan.

Tumatan halui, Utuh Alipan madam ka banua urang. Imbah Abah-Umanya habis umur, inya mudik, mandiami rumah kawitannya, malajari kakanakan mangaji alipan. Anak siapa haja, diupah atawa kada, dilajarinya. Bahanu, inya maambil upah manabuk sumur, mamutik nyiur, maulah sapu haduk, wan sarabanya. Wayah ditakuni, napa gawiannya di banua urang, ujarnya “mandangani urang bausaha”. Inya kada banyak bunyi. Sunyi.
 
Nang maulah urang takun-takunan, malam-malam banyak urang jauh nang bailang ka rumahnya. Pambakal Tuha wan urang kampung gair jua, kaluku Utuh Alipan bakajian ilmu agama nang siwah, nang manyalaya, nang kada sasuai sariat Islam.

Malamnya, rahat rumah Utuh Alipan hibak tamu, Pambakal Tuha wan urang kampung datangan manyugak. Tagal, ayungannya Pambakal Tuha wan urang kampung baundur burit bagamatan, kaluaran. Sakalinya, nang bailang ka rumah Utuh Alipan urang badahi haja, bubuhan alim ulama, nang mangaji ilmu tarikat. Sakalinya, di banua urang Utuh Alipan bagalar “Tuan Guru”, dianggap “waliullah”.

Sambil bajurut bulikan, bajalan batis di padang kadap, bahanu tacalubuk di licak, Pambakal Tuha bapandir lawan urang kampung nang mambuntil di balakangnya, “Harau, supan banar kita. Asa ditapas muha. Sakalinya, sidin hundang bapadah ratik haja.” (ysas)

(“Habar Banua”, TVRI Kalimantan Selatan, Banjarmasin. Siaran Saptu, 27.12.2014, Pukul 5 kamarian.)

Sumber:
https://www.facebook.com/y.s.agus.suseno/posts/688101494642697?ref=notif&notif_t=tagged_with_story