Takaji Habar

Paribasa Banjar sagan urang nang maasi habar nang balum tantu bujur, ngarannya “takaji habar”. “Basa laut”-nya, “termakan isu”. Urang nang “takaji habar”, nang kada tahu bujur-kadanya, bisa tasimbaya.

Bujur jaman sasain maju, urang sapalih magun haja bapikir “handap pada balikat”. Nang mandangar habar, bahabar lawan nang lain. Habar baik wan habar buruk bisa bakurang, bisa batambah, “nang sakilan jadi sadapa, sadapa jadi sahasta”.

Takisah, Aluh Ancung. Utuh Tipang wan Aluh Kaciput bingung, napa mun saban kalian mudik ka rumah wayah parai sakulah anaknya Aluh Ancung taungut tarus. Tumatan halui, Aluh Ancung katuju badundang, pananawa, pangurihingan, bagaya lawan ading, sapupu wan kamanakannya. Marga katuju badundang, sambil sakulah inya umpat pawadahan musik panting. Bahanu inya disaru urang badundang di kampung subarang.

Kada purun maniring anaknya nang mandam kapiu, Aluh Kaciput manakuni. Aluh Ancung manangis, maragap, mangisahakan hatinya nang marista: “Kaka Utuh Halui talanjur purun, kada sayang lagi lawan ulun. Talu tahun kami bagandakan, matan kadada gawian, sampai wayah ini inya nyaman bagawi di banua urang. Di-SMS, di-BBM, ditalipun, kada manyahuti. Napa salah ulun...?”
Di ambin rumah, Aluh Kaciput mambisai anaknya: “Inya manangati ikam badundangkah, Nak?”
“Kada tahu jua. Wayah ulun takuni, inya bapadah kada. Wayah sakitnya ka ulun, imbah nyaman kada tatahu. Mambuang banar....”

“Mun kada bajuduh lawan inya, ikam musti basyukur, Nak ai. Artinya, inya kada baik diambil laki. Kada kawa diasi. Ujar paribasa, ‘baik manyasal di hulu riam pada sudah taka hilir riam’. Saku inya kada katuju ikam bakawan lakian, bubuhan pamantingan, tagal bakulim. Sangkanya ikam kijil. Saku inya sudah baisi gandak, dihabui urang, tamakan pandiran nang kada-kada, atawa takaji habar...” (ysas)

(“Habar Banua”, TVRI Kalimantan Selatan, Banjarmasin. Siaran Jumahat, 24.07.2015, Pukul 5 kamarian.)

Sumber:
https://www.facebook.com/y.s.agus.suseno/posts/803515099768002?comment_id=803631043089741&ref=notif&notif_t=feed_comment_reply