Kaya Kaladi Maucap Birah

Manyambat kakurangan urang, padahal saurang ada kakurangan jua, “kaya kaladi maucap birah”. “Birah” ngaran kaladi jua, tagal taganal. Ujar kaladi, “Ui, birah, ikam ganal-ganal gadang pisang, tagal hungang.” Birah manyahut, “Ikam kihit, kaya pampijit takapit di bawah lampit”. Kaladi wan birah basambatan, padahal asing-asingnya ada kakurangan.

Imbah bacucu, Utuh Tarkul wan bininya Aluh Miang rajin sumbahyang di masigit. Kupiah jangang kada lapas pada kapala Utuh Tarkul, salungkui kada lapas pada kapala Aluh Miang. Malam, Utuh Tarkul jadi wakar, siang mandangani bininya bawarung.

Bulik tumatan pasar, Utuh Kabuau wan bininya, Aluh Piai, singgah di warung Utuh Tarkul. Imbah kawin, kaduanya pindah kampung. Lawas kada badapat, tabarungan warung sunyi. Balampar di tikar, dua pasang laki-bini nang sudah bahuban bapandiran, kaganangan wayah bujangan bahari; batakun habar anak wan dangsanak. Aluh Miang manyurungi Utuh Kabuau wan lakinya kupi, Aluh Piai disurungi satrup.

Ujar Utuh Tarkul lawan Utuh Kabuau, “Dimapa habar Utuh Ambak? Bujurkah samalam anaknya dipupuhi urang kampung subarang, katangkapan bagandakan lawan balu kambang di rumah puang?”
“Bujur ai. Paksa dikawinakan,” ujar Utuh Kabuau. “Tagal, anak Utuh Tipang, bangat lagi. Suwah ditangkap pulisi, imbah mancuntan tipi...” Aluh Miang wan Aluh Piai damintu jua, mamandirakan parigal anak kawan nang kada sampuraka.
 
Nang katuju manyambat urang, kada tasusuri buncu tapih. Utuh Tarkul wan Aluh Miang kada ingat, anaknya saurang suwah dipanjara, mancuntan lunta; anak Utuh Kabuau wan Aluh Piai nang bibinian sawat batianan, sabaluman dilakiakan.

“Kaya kaladi maucap birah”: manyambat kakurangan urang haja, padahal saurang ada kakurangan jua. (ysas)

(“Habar Banua”, TVRI Kalimantan Selatan, Banjarmasin. Siaran Kamis, 18.12.2014, Pukul 5 kamarian.)

Sumber:
https://www.facebook.com/y.s.agus.suseno/posts/682815215171325?comment_id=682832205169626&offset=0&total_comments=24&ref=notif&notif_t=feed_comment_reply