Kada Mambadai Lawan Kalu'ung

Kada mambadai lawan kalu’ung” paribasa gasan urang nang kapintaran wan kabisaannya kadada, tagal baisi jabatan. Pariannya, kada hingkat mangaji, jadi guru mangaji. Kada hingkat badagang, bajualan. Kada hingkat maunjun, jadi paunjunan. Wan sarabanya.

Wayah Utuh Hungang jadi pambakal, urang sapalihan bingung. Napa inya tapilih jadi pambakal? Napa kapintaran wan kabisaannya? Bujur sugih, baisi kabun gatah, kabun nyiur wan jukung tiung, tagal bapandir haja Utuh Hungang bajuju: takulur-kulur, tapuntal-puntal, tapulilit, kada karuan tampuh. Urang bapandir ka hulu, inya ka hilir. Bahanu hinip. Bapadah kabungkalanan, imbah tamakan garih haruan.

Bujur damintu, wayah tamu undangan matan indung banua bakunjang, Utuh Hungang pintar mahimungi. Disuruhnya warga upuan sabinggul saurang. Disurunginya tamu undangan makanan. Dikiaunya panjapinan kampung subarang: bakarasmin, bajapin, bagandut wan badindang ligun malamnya. Muhanya kada tatahu, takujihing di hindau lampu satrungking.

Di halaman rumah pambakal, di bawah rapun kasturi, warga bakalumbun tapih, bacugut manjanaki karasmin. Sapalihan batapak nyamuk. Sapalihan malumu tunjuk. Di warung kupi, Utuh Hayam wan Utuh Lampam bapandiran lawan Pambakal Tuha.

Ujar Utuh Hayam, “Dimapa kisahnya, maka sidin tapilih jadi pambakal? Wayah pamilihan samalam, ulun asa kada mamilih inya.”

“Salah buhanmu jua,” ujar Pambakal Tuha, “nyaman bangat diwaluhi. Buhanmu ‘siuragung umpannya lalat’ jua. Imbah diunjuki kupiah, tapih wan sajadah, dibari baras sagantang saurang, hakun mamilih inya. Ayungannya, buhanmu jua nang manyandangnya. Mustinya apik-apik mamilih, kaluku tapilih bangkung. Buhanmu tapilih urang nang kada mambadai lawan kalu’ung,” ujar Pambakal Tuha sambil baugah, manggalunyur ka rumah. (ysas)

(“Habar Banua”, TVRI Kalimantan Selatan, Banjarmasin. Siaran Kamis, 11.12.2014, Pukul 5 kamarian.)

Sumber:
https://www.facebook.com/y.s.agus.suseno/posts/678169075635939?comment_id=682045868581593&ref=notif&notif_t=comment_mention