Badiri Sadang, Baduduk Sadang, Sasadangnya

Papadah, astilah, pitua wan paribasa Banjar banyak hikmahnya, baik gasan sangu hidup, gasan ingkutan, supaya adat budaya Banjar ada salawasan. Urang Banjar sapalihan sudah rakai, tabarubut pada akar budayanya, kada pinandu lagi lawan adat budaya warisan padatuannya. Hidup-mati di banua Banjar, sapalihan ada nang sudah kada bisa basa Banjar.

Mun bapandir, saku lantih haja. Tagal, suruh kakanakan SMA wan mahasiswa Banjar wayah ini maulah tulisan basa Banjar dadua lambar, saku kapulingaan, “kaya buburak kalingaian”. Saku tahancap maulah tulisan basa Inggris pada maulah tulisan basa Banjar.

Urang Banjar musti bisa “basa laut” -- Indonesia, Arab, Inggris, wan lainnya – tagal basa Banjar jangan ditinggal. Mun basa Banjar langlam, Banjar pacangan langlam jua. Basa Banjar ciri budaya urang Banjar.

Kada karasaan, parak tutup tahun. Saku ada baiknya mangganang pitua padatuan bahari: urang baik tu nang “badiri sadang, baduduk sadang”, bisa mambawa diri, rasuk lawan siapa haja, bagana di banua mana haja. Kada pamburisit, “baundur supan, bamara takutan, bagana kada tahan”; nang ayungannya “saraba santuk”, “badiri santuk, baduduk santuk”.

Malam tahun baru, nang anum-anum sapalihan baramian, bakarasminan, balatupan, baladuman, malikit halili wan kambang sarai. Saku ada nang kada ingat diri, bagandakan, bakinuman, bamaukan, bakalahian, wan gawian mudarat lainnya.
 
Sakira kada tasimbaya, padatuan Banjar bahari bapitua: “sasadangnya”. Baramian, “sasadangnya”; bakarasminan, “sasadangnya”; balatupan wan baladuman, “sasadangnya”; malikit halili wan kambang sarai, “sasadangnya”; baidabul nang kada-kada, “sasadangnya”.

“Badiri sadang, baduduk sadang”, “sasadangnya”, paribasa wan pitua nang kada salahnya diasi, sangu hidup sabaluman mati. (ysas)

(“Habar Banua”, TVRI Kalimantan Selatan, Banjarmasin. Siaran Salasa, 30.12.2014, Pukul 5 kamarian.)

Sumber:
 https://www.facebook.com/y.s.agus.suseno/posts/691051514347695?ref=notif&notif_t=comment_mention