Di Banua Saurang Kaya Macan, Di Banua Urang Kaya Acan

Pamilihan wakil rakyat wan Prasidin RI sudah tuntung. Wakil rakyat di banua, wakil rakyat banua Banjar nang di Jakarta, sudah ada. Parak tutup tahun, sadang ditiring: dimapa gawiannya, amanah hajakah kikira, ingat hajakah kalawan janji wan sumpahnya?

“Di banua saurang kaya macan, di banua urang kaya acan”, paribasa gasan manyindir urang nang wayah di banua saurang pina paiyanya, di banua urang ranai haja.

Takisah, Utuh Tipang. Wayah anum, inya muar lawan pambakal nang kada hingkat bagawi. Kaya macan lapas ikatan, disambatinya Pambakal Utuh Raup. Dihabuinya urang kampung, supaya jangan mamilih lagi. Ujarnya, mun inya jadi pambakal, jalan di kampung pacangan baik; kampung pacangan balistrik; marapai banih kada lagi bairik; gumbaan banih baganti pabrik; langgar wan masigit babaik.

Ringkas kisah, Utuh Tipang tapilih jadi Pambakal Kampung Banjar. Imbah tu, tapilih jadi wakil rakyat di indung banua. Imbah di indung banua, tapilih pulang jadi wakil rakyat banua di Jakarta. Lima tahun sakali, inya cangul: basilaturahmi, baaruhan, manyumbang langgar wan masigit, Hari Raya Haji bakurban sapi.

Tagal, urang Kampung Banjar magun haja bacari makan saurang. Nang bakabun wan bahuma, magun haja kaya bahari. Listrik sudah ada, tagal pajah tarus. Rahat mati lampu, urang bapandiran di gardu. Di buncu, siapakah nang baucap, “Napa gawian Utuh Tipang di Jakarta, maka magun haja mati lampu di banua? Maka batu harangnya matan banua kita?”
Ada nang manyahut, “Cah, kita jua nang tasalah mamilih inya. Inya di banua saurang kaya macan, di banua urang kaya acan.”

Di padang kadap, ada suara, “Banganga dahulu, hanyar baucap. Kita kalah banyak, pahamlah? Tabanyak urang sana, pada urang banua,” ujarnya. Imbah tu, ranai, hinip, sunyi. Kadada bunyi lagi. Lilin parak mati. (ysas)

(“Habar Banua”, TVRI Kalimantan Selatan, Banjarmasin. Siaran Sanayan, 29.12.2014, Pukul 5 kamarian.)

Sumber:
https://www.facebook.com/y.s.agus.suseno/posts/689744994478347?comment_id=691652170954296&ref=notif&notif_t=mentions_comment