Kaya Linut Dalam Katungkang

“Linut” saku tamasuk basa Banjar bahari -- “basa laut”-nya “katak” -- “katungkang” ngaran buah nyiur nang puang, nang kadada isinya. “Kaya linut dalam katungkang” artinya mahirip paribasa Melayu,“seperti katak dalam tempurung”. Bujur mahirip, tagal artinya lain.

“Kaya linut dalam katungkang” rajin gasan manyindir urang nang kapiragahan: piragah harat wan paiyanya, marga baisi pandal. “Pandal”: urang nang pacang malawanakan, mun inya tapahual, tapalampang, bakalahi, lawan urang. Marga dangsanaknya urang ada, inya sakahandaknya; marga kulawarganya urang badahi, inya wani; marga patuhannya tutus bangsawan, bajunya kagubihan; wan sarabanya.

Takisah, Utuh Labih. Inya asalnya urang jaba. Mun batamu lawan urang badahi, asa halus paparutannya. Tagal, imbah patuh lawan Pambakal Utuh Kayap, bajunya asa baganal. Kaduluran, inya harat manangguh tantaran unjun nang pamatukan. Rahat mawarung, inya mandangar Pambakal Utuh Kayap sangkal, manggarunum, kada kulihan tarus maunjun.

Imbah minta maap, dijapainya tantaran Pambakal Utuh Kayap, dipadahakannya kada baik. Isuknya, diatarinya Pambakal Utuh Kayap tantaran unjun. Kaduluran, tantaran unjun bariannya dasar pamatukan. Imbah tu, Utuh Labih samuak-saliur, sarantang-saruntung, lawan Pambakal Utuh Kayap; rajin dibawai bakunjangan, maunjun, di kampung subarang.

Bahari, sipat pambakal musti kaya ular lidi: jagau ada di inya, pintar ada di inya, harat ada di inya, gagah ada di inya. Marga itu, Utuh Labih arai, himung banar, patuh lawan Pambakal Utuh Kayap. Wayah tapahual lawan urang, dijualnya ngaran Pambakal Utuh Kayap; handak babini anum, dijualnya ngaran Pambakal Utuh Kayap; bahutang makan di warung, dijualnya ngaran Pambakal Utuh Kayap. Damintu tatarusan.

Utuh Labih “kaya linut dalam katungkang”: wani, marga ada pandalnya, marga ada nang malawanakannya. Jaka kada, saku “kaya siput dipais” jua. (ysas)

(“Habar Banua”, TVRI Kalimantan Selatan, Banjarmasin. Siaran Kamis, 25.12.2014, Pukul 5 kamarian.)

Sumber:
https://www.facebook.com/y.s.agus.suseno/posts/686843704768476?comment_id=686934618092718&ref=notif&notif_t=comment_mention