“Paku nang lantak di papan”, pakunya pisit tapatak, tapajal, di
papan. Dikuit atawa disungkal bahimat, kada tacabut. Kabalikannya: amun
“kada kaya paku, lantak di papan”, pakunya nyaman haja dicabut. Imbah
dicabut lawan tukul atawa tang, tapacul am pakunya.
“Kada kaya
paku, lantak di papan”, artinya janji, akad, nang bisa diubah.
Pariannya, barang nang sudah ditukar, hingkat dihurupakan. Anak nang
handak mahajiakan kawitan; mustinya tahun ini; duitnya balum mayu, paksa
tahun dudi. Kada “tatak batang”, kada “haraga mati”, hingkat diubah
lagi, sagan kamaslahatan sabarataan.
Takisah, Utuh Tipang.
Imbah minta pitua Angahnya, inya kaganangan lawan Aluh Kaciput. Inya
kada kahandakan babini, kada rusak banar lawan Aluh Kaciput, tagal indah
“mambuang taruh”. Ujar paniniannya, “sakali manimbai lunta, amun takait
haram kada manajuni”. Amun niat baik, dalas bapangsar dada, kahandak
kabul haja.
Imbah malamnya sumbahyang tahajud wan istiharah,
baisukan Utuh Tipang sujud, mancium batis kawitan, minta maap, minta
ampun, minta rida. Inya minta kawitannya basasuluh -- amun kawa,
langsung badatang -- ka wadah kawitan Aluh Kaciput. Imbah takajut
satumat, kawitannya akur haja. Inya manalipun Aluh Kaciput, mamadahakan
pasan kulawarganya handak bailang ka rumah, malam Ahad dihadap.
Malam Ahad, imbah Isya, Utuh Tipang, kawitan, Julak, Angah, Acil, Gulu
wan mamarinanya, ka rumah Aluh Kaciput. Di palataran wan dalam rumah,
banyak urang takumpulan. Imbah basalaman, dudukan, bamula pamandiran.
Aluh Kaciput kadada. Saku di kamarnya. Kawitannya ada, tagal nang jadi
juru pandir dangsanak tuhanya, Julak Aluh Kaciput. Harau, sakalinya,
pandiran Julak Aluh Kaciput hapuk pada gumbili bajarang:
“Aku
sudah tahu kisahnya. Kami sudah bamujakarah jua. Ayuha, hampian tanang
haja. Kada jujuran jua, kalu, nang maulah rumah tangga ruhui rahayu?
Jujuran kada jaminan. Kawa haja kita pandirakan. Kada kaya paku, lantak
di papan...” (ysas)
(“Habar Banua”, TVRI Kalimantan Selatan, Banjarmasin. Siaran Salasa, 07.04.2015, Pukul 5 kamarian.)
Sumber:
https://www.facebook.com/y.s.agus.suseno?fref=ufi
Tidak ada komentar:
Posting Komentar