Burung buburak hidup di pahumaan, di baruh wan padang tagah. Rancak
kana jipah. Burung buburak rajin dijual urang di pasar. Dagingnya
manis, kaya burung balibis. Mun ada urang, inya kabuliangan, bukah,
tarabang randah lalima dapa, basarusup padang tagah. Di padang lingai,
inya kapulingaan saurangan.
“Kaya buburak kalingaian” paribasa
gasan urang nang kapulingaan di wadah hanyar. Nang kaya Utuh Buburak.
Wayah halui, hidupnya kada kaya kakanak lain nang diam di kampung. Inya
bapindah-pindah, umpat abah-umanya bajual pancarikinan di kapal dagang,
ka kampung-kampung di tabing Sungai Martapura, hulu Sungai Barito wan
hulu Sungai Kapuas.
Imbah sampai di kampung tabing sungai,
kapal tambat di batang banyu, bamandak dua talu hari di situ. Titian
diulur. Kapal dagang buka. Urang kampung naikan, manukar baju, salawar,
uyah, asam kamal, timbaku, baras, bawang, gula, sasudu, wancuh, rinjing,
panci, gadur, lunta, tikar, parang, tukul, linggis, pahat wan sarabanya
nang dijual di kapal dagang.
Imbah barang dagangan habis, urang
kapal manukar paikat, gatah, kulit ular, kulit biawak, kulit puraca wan
sarabanya nang dijual urang kampung, gasan dijual pulang di banua
Banjar. Damintu tatarusan. Babulan-bulan. Bapuluh-puluh kampung nang
disinggahi.
Wayah kapal tambat di batang, Utuh Buburak dibawai
abahnya naik ka kampung, gasan batagihan atawa mandapati langganan.
Rahat abahnya bapandir dalam rumah, inya duduk, atawa batajiran, di
palataran: maitihi kakanakan nang sapantaran mainan.
Nang ngaran
kada patuh, inya malumu tunjuk wara. Handak umpat bapandir atawa
mainan, katiya kada paham basanya sahama-hama. Inya kapulingaan
saurangan, “kaya buburak kalingaian”. (ysas)
(“Habar Banua”, TVRI Kalimantan Selatan, Banjarmasin. Siaran Kamis, 04.12.2014, Pukul 5 kamarian.)
Sumber:
https://www.facebook.com/y.s.agus.suseno/posts/674405449345635?comment_id=674491849336995&offset=0&total_comments=4&ref=notif¬if_t=feed_comment_reply
